AMAPHOYISA ATHUNGATHA IQULU LABAPHANGI ABAGASELE ISIBHEDLELA SASEMPUMALANGA BAGEBENGA IZIGULI NABASEBENZI
EZOMPHAKATHI
Amaphoyisa athungatha iqulu labaphangi abagasele esibhedlela saseMpumalanga bagebenga iziguli nabasebenzi bengazelele ngempelasonto.
Lesi sigameko senzeke esibhedlela iCarolina ngoMgqibelo lapho abantu ababili - oyedwa obenenxeba lokudutshulwa, ogcine eshonile, omunye enenxeba lokugwazwa - balethwe yiqulu lamadoda esibhedlela, ngokusho kwamaphoyisa.
Okhulumela amaphoyisa uCol Donald Mdhluli uthe: “Abasebenzi bakwazile ukusimamisa obenenxeba lokugwazwa nobenenxeba lokudutshulwa washona.
Amadoda alethe izisulu avuke umbhejazane aphuca abasebenzi neziguli izimpahla okubalwa namaselula.”
UMdhluli uthe akekho osaboshiwe wanxusa umphakathi ukuthi ulekelele ekufuneni abasolwa.
UNgqongqoshe wezeMpilo uMnuz Sasekani Manzini uvakashele lesi sikhungo ngosuku olufanayo ukuyohlangana nobuholi bezinyunyana nethimba lezokuphepha.
"Selokhu sahlangana namaphoyisa nonogada besibhedlela, kuvunyelwene ngokuthi amalungu e-SAPS agade isibhedlela njalo ngehora, ikakhulukazi ngezimpelasonto.
Kuzohlinzeka ngokwengqondo abasebenzi abathintekayo kanye neziguli, okuhlanganisa nonogada abebesemsebenzini baqinise nezokuphepha ngokufaka izicabha zokugqekeza ezicabheni zamagumbi okusebenzela abahlengikazi,” kusho uManzini.
"Siphazamiseke kakhulu ngalesi sigameko futhi sicela wonke amalungu omphakathi ukuthi asebenzisane [namaphoyisa] ekuvikeleni isibhedlela nabasebenzi. Lolu daba lusazodingidwa noNgqongqoshe wezokuPhepha nokuXhumanisa umphakathi."
UManzini uphinde wathi akekho olimele ngesikhathi kugetshengwa kodwa uveze ukuthi kukhona umonakalo odalekile ebhilidini lesibhedlela.