BADEDELWE NGEBHEYILI ABASOLWA ABANE NGECALA LOKUQOLA U-ESKOM U-R4 MILLION.

Banikezwe ibheyili abasolwa abane ecaleni lokukhwabanisa u-R4.9 million kwa-Eskom

Kusolakala ukuthi leli qembu lihlomule ezinkontilekeni eziningi ezikhishwe ngokungemthetho kwa-Eskom eDuvha Power Station eMpumalanga.

Badedelwe ngebheyili abasolwa abane abasolwa ngokuqola u-Eskom imali engaphezu kuka-R4 million ezinkontilekeni okusolakala ukuthi ezingabazekayo.

Ukukhwabanisa kuka-Eskom ngo-R4.9m

Abasolwa uNozipho Ntuli, 35, George Edward Sekatane, 43, Alfred Lebohang Sekatane, 60, noThulani Harris Mkhabela, 40, bavele eNkantolo yeMantshi yaseWitbank ngoLwesihlanu ngamacala okukhwabanisa nenkohlakalo.

Lokhu kulandela ukuboshwa kwabo ngalo lolo suku Emalahleni ngesikhathi beqhuba umkhankaso wophiko loKlebe oluzinze eSecunda oluphenya ngenkohlakalo nobugebengu obubucayi bezohwebo.

Kusolwa ukuthi, phakathi kuka-2016 no-2019, leli qembu lahlomula ezinkontilekeni eziningi ezinikezwe ngokungemthetho eSiteshini sikagesi sakwa- Eskom, iDuvha Power Station, eMpumalanga.

Ngokusho kokhulumela oKlebe, uCaptain Dineo Lucy Sekgotodi, uNtuli ubeqashwe esikhungweni sikagesi ngamalahle njengomthengi kanti kusolakala ukuthi izinkontileka bezinikezwa ngaphansi kwewashi lakhe ngaphandle kokulandelwa kwemigudu ebekiwe yokuphatha ukuthengwa kwempahla.

Uphenyo loKlebe luveze ukuthi izinkampani ezimbili - iPhoenix ne-Itereleng Masheleng, ezesoka likaNtuli, uSekatane - kusolakala ukuthi zanikezwa izinkontileka neHustle Hard - inkampani yakwaMkhabela.

Kusolwa ukuthi ngesikhathi kukhishwa lezi zinkontileka, uGeorge wayesejele kwathi uLebohang Sekatane nguyena owathatha imininingwane nemibhalo kwa-Eskom eyiyisa kuGeorge ejele kanjalo naye.

Kanti imali elahlekelwe u-Eskom ilinganiselwa ku-R4 911 980 00, kusho uSekgotodi esitatimendeni .

Abasolwa bavele enkantolo ngoLwesihlanu badedelwa ngebheyili. USekatane unikezwe ibheyili ka-R30 000 njengoba enamanye amacala.

Abanye abasolwa abathathu bathole ibheyili ka-R10 000 umuntu emunye.

Icala labo lihlehliselwe umhla zi-5 kuJulayi 2023 ukuze kuqhutshekwe nophenyo.

Inhloko yoKlebe esifundazweni eMpumalanga uMajor General Gerber ulishayele ihlombe ithimba ngokuboshwa kwabasolwa.

Laba bantu ababoshiwe kumele bakhiphe isexwayiso esiqinile sokuthi bangaba abakhwabanisi, ukuphanga kwa-Eskom ngeke kubekezelelwe. Yonke imizamo izoqondiswa ekugwetshweni abenzi bobubi.

OKlebe eMpumalanga bazimisele ngokuletha uzinzo embonini, kusho uGerber.