BEKULINDELEKE BAVELE ENKANTOLO IZOLO ABASOLWA ABABILI ABASOLWA NGECALA LOKUDLWENGULA.

Owesilisa oneminyaka engu-32 ubudala kanye nowesilisa oneminyaka engu-50 ubudala babhekene necala lokudlwengula kulandela izigameko ezimbili ezehlukene ezenzeke eSaselane Trust, eBushbuckridge, kule nyanga.

Abasolwa kulindeleke ukuthi bavele eNkantolo yeMantshi yaseBushbuckridge ngo-Ephreli 24.

Okhulumela amaphoyisa esifundazweni, uBrigadier Selvy Mohlala, uthe bobabili abashonile baneminyaka engu-25 kanti zombili lezi zigameko zenzeke ngesikhathi omama bezisulu beseduze.

Uthe isigameko sokuqala senzeka ngo-Ephreli 18.

UMohlala uthe usingayise (50) ufike ekhaya ngabo-21:00 ngesikhathi yena nonina sebelele. Uthe umsolwa kubikwa ukuthi ungqongqoze emnyango wangeniswa ngumama kamufi. Wacela okuya ngasethunjini, waqeda ukudla waya ekamelweni okwakulele kulo umufi nonina.

Kusolwa ukuthi wadlwengula le ngane eneminyaka engu-25 ubudala unina ebukele. Wabe esephuma endlini.

UMohlala uthe kusolakala ukuthi umama ubengazwelani nendodakazi yakhe, wabe esefonela udadewabo owamtshela ukuthi akabikele amaphoyisa.

Isigameko sesibili senzeke ngomhlaka-23 Ephreli ngo-19:00.

Umsolwa (32) ufike emzini kamufi ehleli nonina. UMohlala uthe le ndoda iyaziwa futhi isatshwa umndeni kamufi. Umsolwa ungene kulo muzi wahudulela umufi komunye umuzi okukhona lapho okusolakala ukuthi wadlwengula.

UMohlala uthe kusolwa nokuthi umsolwa usabise ngokuqhubeka nokumhlukumeza uma etshela noma ngubani ngalesi sigameko.

Uthe umsolwa uhlala endaweni eyodwa kanti umufi kuthiwa unesibongo esifanayo, nokho akucaci noma umsolwa nesisulu bahlobene yini.

Lona wesifazane uphinde wabikela udadewabo ngezinsolo zokudlwengulwa, owamtshela ukuthi akabikele amaphoyisa.

UMohlala uthe uphenyo lokuqala lwamaphoyisa luveze ukuthi umsolwa uke wadlwengula isisulu ngaphambi kukaJanuwari.

Bobabili abasolwa basanda kuboshwa kanti bekumele bavele eNkantolo yeMantshi yaseBushbuckridge namuhla, nokho, imiphumela yokuvela kwabo ibingakaziwa ngesikhathi sokushicilela