KUSHONE ABANTU ABAYISITHUPHA EZIGAMEKWENI EZAHLUKENE KABOKWENI NASECLAU-CLAU

Kushone abantu abathathu ngesikhathi kuhlasela iqulu labantu, kwathi abanye abathathu batholakala beshonile ezigamekweni ezahlukene endaweni yaKaBokweni naseClau-Clau

Okhulumela amaphoyisa esifundazweni, uBrigadier Selvy Mohlala, uthe isigameko sokuqala senzeke eSifunindlela KaBokweni ezintatha zangoLwesihlanu.

Uthe amaphoyisa aKaBokweni athole imibiko ngabantu abathathu abashayiwe. Ngesikhathi amaphoyisa e-SAPS efika, uMohlala uthe afice umuzi ushisiwe ngesikhathi sesigameko.

Uthe amadoda amabili kutholwe ukuthi ashonile endaweni yesigameko, kanti owesithathu ubesesimweni esibucayi nokwathi ngokuhamba kwesikhathi washona ngenxa yokulimala kwakhe.

UMohlala uthe ngesikhathi amaphoyisa esendaweni yesigameko, athole ucingo lokuthi kutholakale izidumbu zabesilisa ababili abaneminyaka engu-21 no-40 ubudala eKhumbula ngaseKaBokweni.

Uthe amadoda atholwe enamanxeba amaningi.

"Emuva kwamahora amabili, amaphoyisa athola omunye umbiko ngesidumbu sesithupha esitholakale ehlathini eClau-Clau," kusho uMohlala.

Uveze ukuthi imibiko engaqinisekisiwe ihlobanisa izisulu ezintathu zokuqala njengabasolwa ngesigameko sokugebenga esisanda kwenzeka endaweni edayisa utshwala Emvangati.

Kungaleso sikhathi sokugetshengwa lapho kuthiwa izisulu zakhonjwa ngamalungu omphakathi.

Uthe amaphoyisa awakwazi ukuhlanganisa lezi ezinye izisulu ezintathu nalesi sigameko, futhi bathemba ukuthi uphenyo oluqhubekayo luzoveza imbangela yokushona kwabo.

UMohlala uthe zimbili kuphela izisulu ezihlonziwe kuze kube manje, kanti ezinye ezine azikaziwa.

UKhomishana wamaphoyisa esifundazweni, u-Lieutenant General Semakaleng Manamela, usekhiphe isexwayiso esiqinile emalungwini omphakathi ukuthi ayeke ukuzithathela umthetho ngezandla avumele ubulungiswa buthathe indawo yabo.

“Abanye abantu bangase bahlukunyezwe ngenxa yezinhlelo ezifihliwe ngabamangaleli babo futhi bagcine belahlekelwe izimpilo zabo ngamacala abangakaze bawenze,” kusho yena.