KUZOHLOMULA AMADOLOBHANA ANGAMASHUMI AMABILI NESISHIYAGALOLUNYE(29) EMPUMALANGA NASELIMPOPO OHLELWENI LOKULETHWA KWAMANZI

UNgqongqoshe Wezamanzi Nokuthuthwa Kwendle uSenzo Mchunu uthi izigodi ezingu-29 zaseMpumalanga naseLimpopo zizohlomula ohlelweni lweLoskop Regional Bulk Water Supply Project.

Iphrojekthi ebiza u-R1.67b njengamanje iyaqhubeka yokudonsa amanzi aluhlaza edamini i-Loskop nokuhlinzeka ngamanzi ezigodini ezingama-21 ezingaphansi kukaMasipala Wendawo wase-Thembisile Hani eMpumalanga, kanye nasezigodini eziyisishiyagalombili eMoutse-East ngaphansi kukaMasipala Wendawo wase-Elias Motsoaledi eLimpopo.

Izinselelo zamanzi ezibhekene nalezi zigodi zizophela maduze, kusho uNgqongqoshe uSenzo Mchunu.

Umasipala waseThembisile Hani uke wabhekana nezinselelo zokuhlinzekwa kwamanzi ngenxa yokungawatholi umthombo wamanzi.

“Ukuqaliswa kweLoskop Bulk Water Supply Scheme kuzoqinisekisa ukuthi umasipala unomthombo wamanzi nokuthi adluliselwe kubahlali.

“Kungalesi sizathu uMnyango usuzibophezele ukwakha ipayipi elingamakhilomitha angu-30 elizodonsa futhi lidlulise amanzi edamini iLoskop eLimpopo liwaqondise eThembisile Hani.

Lokhu kuhambisana nokwakhiwa kwesikhungo sokuhlanza amanzi kanye namadamu okuzoletha ukukhululeka, nokuqinisekisa ukuthi umasipala unezidingo eziqhubekayo kubahlali bawo.

“Amanzi akhishiwe azobe esehlanzwa endaweni yokuhlanza amanzi futhi agcinwe emachibini.

Iziphathimandla zophiko lwezamanzi (iSifunda saseNkangala kanye nesifunda saseSekhukhune) zizomisa bese zisabalalisa kubantu baseThembisile Hani nabaseMoutse East e-Elias Motsoaledi ukuze balethe usizo lokuhlinzekwa kwamanzi adingeka kakhulu emiphakathini,” kuchaza uMchunu.

Ungqongqoshe unxusa umasipala waseThembisile Hani ukuthi wenze isiqiniseko sokuthi amathanga amanzi asatshalaliswa ezindaweni ezinezingqinamba zokulethwa kwamanzi afinyelela kuyo yonke imiphakathi eswele.

“Sithanda ukunxusa umasipala ukuthi wenze isiqiniseko sokuthi njengoba behlangabezana nokuphazamiseka kokuhlinzekwa kwamanzi futhi basabalalisa amathanga amanzi ukuze alethe isikhashana, yonke imiphakathi edinga usizo iyasizwa,” kusho uMchunu.

Umklamo wamanzi waseLoskop uwumklamo onqamula imingcele futhi uhlanganisa amaphakheji omsebenzi amahlanu, okuhlanganisa ukulandwa kwamapayipi angama-30km asuka edamini laseLoskop.

Ezinye izingxenye zephrojekthi zihlanganisa ukwakhiwa kwamadamu amabili amanzi, iziteshi zokumpompa kanye nomsebenzi wokuhlanza amanzi okuzohlinzeka ngo-20ML ngosuku emiphakathini yaseThembisile Hani, kanye no-3ML wamanzi ngosuku azophakela umphakathi waseMoutse East.